واش عليه ؟واش فيها ؟
عيشة بنتي انصورك بلا خمار
عري على وذنيك وتعشي لاباس
غدوة بنتي توقفي عند الصوار
هذيكا حقوق كيفك كيف الناس
ديريلك بسبور كي تحبي لسفار
وتروحي لفرانسا ولا دالاس
قالت بنتي علاش عنا ذا الحصار
وستر الطفلة في الشرع هو الأساس
شرع الله يقول جنة ولا نار ؟
كلش بالميزان عندو والقسطاس
قلتلها بالسيف ماراني مختار
وانا قلبي رهيف للباطل حساس
قالو لبيوميتري علم وتحضار
والقيامة قايمة على سي دوز آس 12
ويح اللي عراونا وفضحوا لسرار
سار الله يحاربوا فينا نخاس
قالوا برلمان هو ايدير قرار
قلتلهم حسراه مافيهم تراس
هذا برلمان فقفاق او هدار
أغلبية مزورة تحب التغطاس
والبقية شاهدة زور وتزكار
تعرفها من هيه تفرح بالترداس
قوانين يديرها رايس جبار
ونايم(عفوا نايب) يقبل واش جاه من الرياس
فيلا وطوموبيل والمهنة بزار
وفي الطيارة يكون في بريميار كلاس
والمسكينة بنيتي قالت واش صار؟
جرب روح احتج ما تقطع لياس
لوتعرف قمقوم ولا كوميسار
والضربة ايلاجات توجع في الفرطاس
قلت الدولة كاثرة فيها لشرار
قوانين مزورة والشعب ارخاس
يابنتي نظامنا فاسد حقار
ما تقدر ادير للخاين عساس
وماهي غير فرانسا ضد الفولار
هي العقرب حرشت عنا لانجاس
واحرارات بلادنا راهم في العار
دارك راه رايبة وبلا قنطاس
مدرة ضد الدين هازين ومنشار
واللي قعدت بور لحقوها بالفاس
رحت لرايس الدايرة واخترت انهار
عودت من الجان شيطان الوسواس
وينوا سيدي يقولي راني محتار
قدامك عراونا ياسي عباس
قالي ذا قانون وللتعليمة شار
جيت مروح رادف بنيتي إيناس
بنتي راني امريض من هذا التزيار
ماتزيديش تشربيني مر الكاس
ما العقبة اللحدور نجري ليل انهار
ريقي جف ابنيتي مضرب المهراس
نرجع للنعجات في الغابة واحمار
ولبينة وادهان والكسرة رخساس
وتوحشت بنيتي ناس الدوار
وقعدة مع عاشور وعلي والوناس
ما قومت نشوف بنتي ذا التحزار
غش وزور وزوخ رشوات وتمكاس
عري على وذنيك والخالق غفار
وغدوة يوم الدين تتخاصم لجناس
هذا شرع الله ماهوش عقار
ولا تعليمات شيطان خناس
والحجاب اللي انذكر ما هوش عار
ماهوش كتان كساي ولباس
وين الرجلة وين ساداتي لغيار
قلبي يا لخوان بالضربات تقاس
غدوا يقولوا بلعوا الجامع كي الدار
ماكاين للدين في الدنيا حرا س
رانا كي القطعان والراعي غدار
ما جعلنا قرآنا نهج ونبراس
وينو البرلمان ما تحرك ما ثار
عهدة مرت دارها زردة وتغماس
ماهم لا تيين بيك يجرو على الدينار
داروها صحبات عرضات وتحواس
رند وجبهة راضيين على التكسار
وطبعتها من هيه في الرحبة حماس
والبوعزيزي عاش في حياتو خضار
واحرق جسدو ولاح حجرة في ذا الساس
زين العابدين عبرة واعتبار
ما نفعاتو افلوس والمرمر والماس
عبرة للملوك والدنيا مشوار
وجاي انهار تضمنا فيها لرماس
عمر النعجة تروق من خاين جزار
وعمر الربح يروح للعايش خماس
هذا زمان صعيب ما تصحب خمار
حياتوا عندو كلها في جغمة كاس
واحذر من إثنين خير ما تختار
أولهم ديوث والثاني مكاس
راني برك نقول في جملة لشعار
ونفاجي على خاطري من ذي لمراس
محمد براح /الجزائر 13/05/2011
موضوع: واش عليه ؟واش فيها ؟ جديد الاستاذ محمد براح 
