على بركة الله : كنحتاجوا فلفل حلو +فلف حار على حسب الذوق ،الي مكنتيش من محبي الحار ممكن ليك تستغني عليه + بصل + قزبر ومعدنوس
كنحك الفلفل فالحكاكة الغليظة وكذلك البصل طبعا من بعد منكون غسلتهم مزيان ،من بعد كنزولو ليهم هذاك الماء ديالهم،كنعصرهم مزيان حتى كيبقاو ناشفين،كنقطع الربيع،الشحمة _بالنسبة للشحمة كنطحنها فالطحانة الكهربائية ديال الكفتة ،او ممكن دقيها ،المهم خصها يبقى عندها ملمس ناعم لين وهذا هو محل الاختلاف مع باقي الطرق ،حيت شفت اننا حنايا كنعمرو بيها وهي مطحونة او مدقوقة ماشي مشحرة فوق النار مع البصلة وباقي العناصر لي ممكن يتضاف ليها الجزر محكوك يعني عندنا مرة وحدة لي كدوز فوق النار وهي ملي كتكون وسط الخبز فقط_،كنضيف العطرية لي هي :الملح ،الكامون،الابزار،التحمرة،الخرقوم،وشوية الحبيبات من حبة الحلاوة كتكوني حكيتهم بين ايديك ،مع ملاحظة ان الكامون كنديروه بالزايد شوية كنضيفو شوية ديال الزيت،وواحد الحاجة انا كنظن ان ماشي جميع المغربيات كيعرفوها ،هي معروفة فمدينتنا بزاف وهي البصل كارم ،كنستعملوه فبزاف ديال الوصفات لي منها خبز الشحمة ،المهم كتشدي هاد البصل كتدقيه حتى يولي مهرمش وكتضيفيه لبقاي العناصر _هذا ايضا فرق اخر مقارنة مع الطرق الاخرى _،هو صحيح كيزيد واحد الذوق فخبز الشحمة ،ولكن الى ممتوفرش بلاش منو ماشي مشكل كتتكفي بباقي العناصر
نوريكم الصورة ديال البصل كارم
هاهو من بعد مدقيتو،هو راه كيجي مهرمش،ولكن انا غسلتوا شوية قبل ندقو داكشي علاش جاني بهاد الشكل متماسك
من بعد كنخلطوا جميع العناصر مزيان حتى تندمج بيناتها هاهو الشكل ديالها
هذا فيما يخص الحشوة بالنسبة للعجين ،فهو العجين العادي ديال البطبوط ،عندنا الاختيار يا اما نعمرو الخبيزات ديالنا ونكرصوهم ونخليوهم يخمرو ومن بعد نطيبهم،اما نخليو العجين غير يجي يخمر ونطيبو الخبز ديالنا مباشرة،اما نخليو العجين يجي يخمر ونكرصو الخبز ونخليوه يرتاح غير شي شوية ونبداو نطيبوا
انا خليتوا غير جا يخمر درت منو كويرات ،عمرتهم ،وبديت كنكرص ونطيب مباشرة
الصور غادي توضح ليكم حبيباتي:
هنا من بعد ما خمر
عملت منو كويرات
كناخذ كرة كنبسطها غير شي شوية كنعمرها بالحشوة
كنبدا ندور فهاديك الكرة وكنطلع فالاطراف ديالها للفوق حتى كطلع كلها وكتغطى الحشوة مكتبقاش تبان وكنسدها _هنا فراق اخر بالنسبة للطرق الاخرى،محيت انه كطريقة اخرى يتم استعمال زوج ديال الكرات كنديرو الحشوة فوحدة وكنديرو عليها الاخرى ونسدو من الجناب_
غادي نزيد هاد الصور باش الطريقة توضح اكثر،راني حاولت نشرح ولكن ماعرفت واش الفكرة غادي توصل ولالا ههه
هنايا من بعد ما ساليت جميع الكرات
كنبدا نكرص ونطيب
وهذا هو الشكل ديالو في الاخير بالصحة والراحة، ونتمنى يعجبكم
السلام عليكم حبيباتي ،في حفظ الله ورعايته _ياريت متبخلوش عليه بالدعاء ربي يوفقني،وينولني لي فبالي .جزاكن الله خيرا_ [/size]
موضوع: الخبز ديال الشحمة 
ههه
[/size]
.
[/size]